Neste mes, comezo das vacacións para moitas e moitos, dei por rematado o tratamento de quimioterapia (o día 1) e comecei coas consultas no Centro Oncolóxico de Galicia, en A Coruña, previas a comezar o mes que vén coa radioterapia.
A verdade é que foi todo moi ben, a única suxestión que lles fixen tras rematar o tratamento foi a de cambiar o rótulo da fachada ;)
Sempre intentando alterar o mínimo posible as nosas actividades habituais, case podo afirmar que este mes de xullo foi realmente de vacacións:
IAGO puido gozar de festas e festivais ao tempo que recuperaba o tempo que non estivo cos seus amigos e amigas durante este curso que viviu en Estados Unidos.
ÁNXELA seguiu coa súa admiración ao Dépor, xogando e gañando torneos de tenis e gozando do tempo compartido coas súas amigas e amigos.
PAULO feliz día e noite no Fiddle Camp co violín que tanto lle presta tocar, enredando pola casa ou ben gozando de momentos divertidos no Parque Acuático.
E ROSALÍA tivo tempo para acampar de fin de semana, competir a tenis en diferentes torneos e mesmo remar en canoa pola Ría de Arousa.
Por certo, mirade que "remake" máis chulo fixemos o día que fomos ao Parque Acuático de Cerceda.
A verdade é que os catro debían gozar dun merecido descanso despois dos éxitos que foron capaces de lograr durante o curso malia as adversidades que tiveron que vivir. Que ben o fixeron eles e que ben me fan sentir a min!
Rematei este mes publicando no Progreso e mais na Voz de Galicia, esta carta coa que insistín na necesidade de que o Hospital de Lugo sexa dotado dos servizos de medicina nuclear, hemodinámica e radioterapia.
Sería bo que fósemos conseguindo algunha mellora para as e os enfermos lucenses...